Танканд дайруулсан ч амьд үлдэж чаджээ
440 
Өнгөрсөн оны есдүгээр сард Украины Херсон мужид өрнөсөн дайны үеэр 30 настай Илья Пылыпенко танканд дайруулсан ч амьд үлджээ. Цэргүүд түүнийг яаралтай нүүлгэн шилжүүлж, тэр нөхөн сэргээх эмчилгээний төвд очсон байна.
Тэрээр хэд хэдэн удаа хагалгаанд орж, түлэгдэлтийн улмаас арьс шилжүүлэн суулгах мэс засал хийлгэжээ. Мөн баруун хөлийн өвдөгнөөс доош хэсгээ тайруулахаас өөр аргагүй болсон байна.
Зургаан сарын турш эмчилгээ хийлгэсэн талаараа Илья Пылыпенко “Надад урам хугарах, итгэл найдварын аль аль нь мэдрэгдсэн. Эмчилгээний хамгийн хэцүү үе ард хоцорлоо. Одоо миний мөрөөдөл бол удахгүй алхах” гэв.
Дайны өмнө Илья Пылыпенко Украины Виницяа хотын үл хөдлөх хөрөнгийн зуучлагч байжээ. Гүйлтийн спортоор хичээллэдэг тэрээр 2021 онд марафон гүйлтийн тэмцээнд оролцож аж. Өнгөрсөн оны хоёрдугаар сард Орос Украин руу дайрсан цагаас өөрийн хүсэлтээр дайнд оролцох гарын үсгээ зурсан байна. “Өөрийгөө битгий дутуу үнэл, бас өөрийгөө өрөвдөх ёсгүй. Бүх зүйл хэвийн, би амьд, энэ бол төгсгөл биш” гэж тэрээр ярьжээ.
Украины Эрүүл мэндийн яамны нөхөн сэргээх эмчилгээ хариуцсан мэргэжилтэн Василий Стрилка “Дайны улмаас шархадсан цэргүүдийг түрүүлж эмчилсний улмаас бусад мэс засал цуцлагдсан. Хорт хавдрын эмчилгээ нь хойшилсон тул олон өвчтөн нас барсан. Эрүүл мэндийн ажилтнууд бие махбодын гэмтлийг нэн тэргүүнд тавих ёстой учраас хүн амын дунд сэтгэцийн эрүүл мэндийн хямрал нэмэгдэж байна” гэлээ.
Украины нөхөн сэргээх үйлчилгээний ачаалал эрс нэмэгдэж, одоо 11 мянган өвчтөн эмчлүүлж байна. Өвчтөнүүдийн дийлэнх нь гар, хөлгүй болсон. Эмнэлгүүдийн ачаалал ихсэж, антибиотикийн хомсдолд оржээ.
Эх сурвалж: BBC, Gogo.mn
ЭНЭ МЭДЭЭНД ӨГӨХ ТАНЫ ҮНЭЛГЭЭ?
Like
0
Хаха
0
0
Буруу
0
Гайхмаар
0
Харамсалтай
0
Хөөрхөн
