Sanuulga.mn

“SAVE ANGELS” төслийн хүрээнд Говь-Алтай, Хөвсгөл аймгийн нэгдсэн эмнэлэгт 400 орчим сая төгрөгийн тоног төхөөрөмж гардууллаа

2022-11-18

Админ - Сэтгүүлч

365

5м унших

“SAVE ANGELS” төслийн хүрээнд Говь-Алтай, Хөвсгөл аймгийн нэгдсэн эмнэлэгт 400 орчим сая төгрөгийн тоног төхөөрөмж гардууллаа

Өнөөдөр буюу 11-р сарын 17-нд дэлхийн дутуу төрсөн нярайн өдөр тохиож байна. Энэ өдөр ЭМЯ дээр JCI Монгол ТББ-аас хэрэгжүүлдэг дутуу төрсөн нярайн эндэгдлийг бууруулах зорилготой "Save Angels" төслийн хүрээнд дутуу төрсөн нярайд үзүүлэх тусламж үйлчилгээнд нэн шаардлагатай 400 орчим сая төгрөгийн үнэ бүхий эмнэлгийн тоног төхөөрөмжүүдийг Говь-Алтай болон Хөвсгөл аймгийн нэгдсэн эмнэлгүүдэд гардуулах үйл ажиллагаа боллоо.

Тус үйл ажиллагаанд Эрүүл мэндийн яамны төрийн нарийн бичгийн дарга Ц.Эрдэмбилэг, JCI Монгол байгууллагын 2022 оны үндэсний ерөнхийлөгч Ж.Дамдинцэрэн, салбар байгууллагын гишүүд мөн Говь-Алтай болон Хөвсгөл аймгийн нэгдсэн эмнэлгийн төлөөллүүд оролцлоо.

Энэ үеэр Эрүүл мэндийн яамны төрийн нарийн бичгийн дарга Ц.Эрдэмбилэг "ЭМЯ-ны зүгээс эх, хүүхдийн тусламж, үйлчилгээг чанарын шинэ түвшинд гаргах зорилт тавин ажиллаж байна. Энэ ажлын хүрээнд Монгол Улсын хэмжээнд үйл ажиллагаагаа явуулж буй бүх төрөх эмнэлгийн төрөх ор болон тасгийн орыг иж бүрэн шинэчилсэн. Мөн улсын хэмжээнд эх, нярай, хүүхдэд үзүүлэх тусламж, үйлчилгээг сайжруулах чиглэлээр 168 тэрбум төгрөгийг шийдвэрлэж, орон нутгийн эмнэлгүүдийн тоног төхөөрөмж, хүчин чадлыг сайжруулах, хүний нөөцийг чадавхжуулах чиглэлээр ажиллаж байна. Өнөөдөр JCI Монгол байгууллагаас 400 орчим сая төгрөгийн тоног төхөөрөмжийг гардуулж өгсөнд талархал илэрхийлье." хэмээлээ.

Ташрамд дурдахад JCI Монгол байгууллага нь Save Angels төслийг 2015 оноос хойш жил бүр тогтмол хэрэгжүүлж байгаа бөгөөд өнгөрсөн найман жилийн хугацаанд Эх Хүүхдийн Эрүүл Мэндийн Үндэсний Төв, Амгалан амаржих, Өргөө амаржих, Архангай, Завхан аймгийн нэгдсэн эмнэлэг зэрэг газруудад дутуу төрсөн нярайд нэн шаардлагатай 1.2 тэрбум төгрөгийн үнэ бүхий тоног төхөөрөмжийг хандивлажээ.
JCI Монгол байгууллага энэ жилээс төслийн цар хүрээг улам өргөтгөж нь Hello baby апликэйшн-тэй хамтран дутуу төрөлт, төрөхийн хүндрэл, нярайн эндэгдэл зэрэг эх нярайн эрүүл мэндийн аливаа эрсдэлийг бууруулах, урьдчилан сэргийлэх зорилгоор, эхчүүдийн жирэмсний үеийн эрүүл мэнд, нярайн асаргаа, нярайн эрүүл мэндийн талаар технологид суурилсан боловсрол, мэдлэг, олгох эрүүл мэндийн мастеркласс бүхий контент бэлтгэн hello baby аппликэйшн-ээр дамжуулан жирэмсэн эхчүүдэд хүргэх чиглэлээр Save Angels-Digital Health төслийг санаачлан хэрэгжүүлээд байна.