Б.Амгаланбаатар: Монголын Парламентад ардчилалын цайз болж байгаа АН-д нэгдэж байгаадаа сэтгэл хангалуун байна
268 
Монголын Либерал Намын Ерөнхий нарийн бичгийн дарга Б.Амгаланбаатартай ярилцлаа
- Монголын Либерал нам (цаашид МЛН гэх) анх хэдэн он байгуулагдсан вэ, хэдэн жил үйл ажиллагаагаа явуулж байгаа нам билээ?
- МЛН анх 1999 он байгуулагдсан, 26 жилийн түүхтэй нам юм. Миний хувьд 2014 оноос хойш МЛН-ын даргаар ажиллаж байгаад 2022 онд намын даргын ажлаасаа чөлөөлөгдснөөс хойш өнөөдрийг хүртэл МЛН-ын Ерөнхий нарийн бичгийн даргын үүрэгт ажлыг гүйцэтгэж байна. Одоо манай МЛН-ын даргаар Э.Оргил гээд АНУ-д Их сургууль төгсөөд, эх орондоо ирж бизнесийн салбарт ажиллаж байсан мэдлэг чадвартай шилдэг залуу ажиллаж байгаа.
- МЛН Ардчилсан намтай нэгдэхээр болсон гэх мэдээлэл олон нийтийн сүлжээнд гарсан. Энэ хэр үнэний хувьтай вэ. Намууд хоорондоо нэгдэх нь улс төрийн намын түүхэнд байдаг л зүйл, гэхдээ намын үзэл баримтлалын хувьд харилцан таарч “тохирох” эсэх асуудал чухал
- МЛН маань өөрөө хувь хүний эрх чөлөөг дээдэлдэг, либерал үзэл баримтталалтай учраас АН-ын зарчим, үзэл баримтлал, үнэт зүйлстэй зөрчилдөх зөрөх асуудал байхгүй. Харин ч үзэл баримтлалын хувьд харилцан бие биенээ дэмжээд явах боломжтой гэж харж байгаа.
- МЛН, АН-тай нэгдэх болсон гол шалтгаан юу вэ? Магадгүй зарим хүмүүс таныг МЛН-ыг АН-д “худалдчихлаа” гэж хардах юм биш биз
- 2026 оны сүүлээс хэрэгжих Улс төрийн намын тухай хуульд орж байгаа нэмэлт өөрчлөлтөөр намын гишүүдийн босго тоо нь хүссэн хүсээгүй улс төрийн жижиг намуудад парламентад суудал авах боломжийг хязгаарлах нөхцөл байдлыг үүсэж байгаа. Парламентын ардчилал хумигдаж байгаа ийм нөхцөлд Монголын парламентад ардчилалын цайз болж байгаа АН-д МЛН нэгдэж, ардчилал, хүний эрх, эрх чөлөө, либерал үзэл санааг улс орны хэмжээнд хэрэгжүүлэхэд оролцох боломжтой гэж дүгнэсэн.
АН-тай бид нэгдэх болсон өөр нэг шалтгаан гэвэл ээлжит УИХ-ын сонгуулийн жил болохоор эрх баригч намаас сонгуульд оролцохдоо мөнгө, албан тушаалаар түрий барьж, сонгуулийн өмнө “намуудын тоглоомын эвсэл”, тоглоомын улс төрийн нам, нэр дэвшигчдийг “зохион байгуулан” сонгуульд оролцуулж, парламентад суудалгүй намуудыг парламантед суудал авах, сөрөг хүчин болох боломжийг нь хязгаарлаж, тэднийг дэмжигчдийн саналыг унагаадаг, зөвхөн өөрсдөө л олонхи болох нөхцөлийг үүсгэдэг ийм байдлыг бид олон удаагийн сонгуулиар харлаа. Цаашдаа ийм зүйлийг таслан зогсоохын тулд бусад намууддаа уриалж, МЛН Ардчилсан намтай нэгдэх хүсэлтээ гаргаж байгаа юм.
Нөгөө талдаа МАН 9 дахь жилдээ Засгийн эрх барьж байгаа хугацаанд Монгол Улсын хүний эрх, хэвлэлийн эрх чөлөө бүх индексээрээ ухарч байгаа. Тэгэхээр бид одоо яалт ч үгүй нэг талдаа гарахаас өөр аргаагүй болж байгаа юм.
Байгуулагдсан цагаасаа хойш сонгуульд оролцож байсан ч парламентад суудал авч байгаагүй. Гэсэн хэдий өдийг хүртэл явж ирсэн МЛН, үзэл баримтлалын хувьд хамгийн ойр АН-тай нэгдэхийг хараад тус намыг намайг “худалдчихлаа” гэж харж байгаа хүмүүс байгаа бол тэдний л хувийн үзэл бодол, хардах эрх гэж л бодож байна даа.
- Нам нэгдэхэд хүсэлт гаргахад намын удирдах зөвлөлөөс улс төрийн шийдвэр гараад явах байх. Тэгэхлээр танай намын гишүүд болон удирдах зөвлөлийн шийдвэр ч гарж байгаа гэж ойлгож байна. Энэ шийдвэрүүд дунд ямар нэгэн байдлаар татгалзах, эсрэг санал гарсан зүйл байгаа юу?
- Мэдээжийн хэрэг холбогдох хууль дүрмийн хүрээнд асуудлууд шийдвэрлэгдсэн. 2025 оны 04 дүгээр сарын 02-ны өдөр бид МЛН-ын IX Их хурлаа амжилттай зохион байгууллаа. МЛН-ын IX Их хуралд оролцсон гишүүдийн 100%-ын саналаар МЛН-ыг цаашдаа Ардчилсан намтай нэгдэж нэг тугийн дор явъя гэдэг ийм санаачлагын дор нэгдсэний үндсэн дээр нэгдэх хүсэлтээ өнөөдөр /2025.04.04/ Ардчилсан намын ЕНБД Н.Ганибалд өргөн барьлаа.
Sanuulga.mn
ЭНЭ МЭДЭЭНД ӨГӨХ ТАНЫ ҮНЭЛГЭЭ?
Like
0
Хаха
0
0
Буруу
0
Гайхмаар
0
Харамсалтай
0
Хөөрхөн
