Н.Учрал: Х.Баттулга танд "Төгрөг нуурын орд"-ыг зарсан асуудлаа шийдэх ДОЛОО хоног өгье
136 
Монгол Улсын Засгийн газрын хуралдаанаас гарсан шийдвэрүүдийг танилцуулж байна.
Энэ үеэр ЦХИХХЯ-ны сайд Н.Учрал "Өнөөдрийн Засгийн газрын хуралдаанаар Монголын газар нутгаар дамжуулан ОХУ-аас БНХАУ руу байгалийн хийн хоолой нийлүүлэх, хоолой барих төслийн ажилтай танилцлаа. Энэхүү байгалийн хийн хоолой нь ОХУ-аас БНХАУ хүртэл 958.6 км, зургаан аймаг 22 сумдын нутгаар дайран өнгөрдөг. Энэ төсөл урагшилснаар эдийн засгийг тэлэх барилга угсралтын үедээ 12, ашиглалтын үедээ мянга гаруй ажлын байр бий болгох боломжтой.
Мөн өнөөдрийн Засгийн газрын хуралдаанаар Үндэсний баялгийн сангийн хэрэгжилт, Эрдэнэс таван толгой компанийн ногдол ашгийг иргэдэд хуваарилалт хийх талаар мэдээлэл хийж тодорхой чиглэлүүд өгөгдсөн байна.
Үндэсний баялгийн сангийн хуулийг хэрэгжүүлэх хүрээнд Аж үйлдвэр, эрдэнэс баялгийн яамнаас стратегийн 16 ордын хил хязгаарыг тогтоох асуудлыг танилцуулсан. Мөн 2007 оны тогтоол дээр байсан 39 стратегийн ордуудыг УИХ-д өргөн барихаар бэлдэж байна. Ирэх долоо хоногт УИХ-ын тогтоолыг боловсруулж Засгийн газар эцэслэнэ. Ингэснээр стратегийн 16 ордыг 39 өөр нэмэгдүүлэх буюу нийт 55 стратегийн ордыг УИХ-аар батлуулахаар бид бэлтгэж байна. Монголын ард иргэд 55 ордоос Тавантолгойн ноогдол ашигтай ижил хүртээд эхэлбэл ямар хэмжээний ашиг хүртэх нь ойлгомжтой. 2024 онд Эрдэнэс таван толгой ХХК 3.9 наяд төгрөгийн борлуулалт хийсэн.
Компанийн хуулиар ногдол ашгаа хувьцаа эзэмшигч нартаа хуваарилж байгаа.Иргэд бэлэн мөнгө тараалаа гэх хандлагатай байна. Та бүхэн энэ компанийн хувьцаа эзэмшигчид учраас л ашгаа хүртэж байна шүү дээ. ХХОАТ хасагдсан дүнгээр 93.500 төгрөгийг одоо тараахаар ажиллаж байна. Энэ талаар Эрдэнэс Тавантолгой ХХК Засгийн газарт мэдэгдсэн. Засгийн газар хувьцаа эзэмшигчийн хувиар татгалзах зүйл байхгүй.
Бид энэ жилдээ гурав дахь удаагаа ногдол ашгийг хуваарилах гэж байна. Ирэх жил ногдол ашиг нэмэгдэнэ.
39 стратегийн ордуудыг 18 жил мартагдуулсан. УИХ руу оруулж ирээгүй учраас аль нь ч стратегийн ордод тооцогдоогүй. Энд Улсын төсвөөр нөөц нь тогтоогдсон ордууд байгаа. Дээрх 18 жилийн хугацаанд стратегийн эдгээр ордуудыг гадаад, дотоодын компаниуд санхүүгийн схем үүсгэж арилжаалсан, баялгийг иргэдээс, эздээс нь асуугаагүй үрсэн. Иймээс УИХ тогтоолоор боловсруулж, өргөн мэдүүлж 39 ордоо стратегийн ордоор даруй тооцуулж авах шаардлагатай байна.
39 стратегийн орд газар дотор "Төгрөг нуурын орд" хамаардаг. "Төгрөг нуурын орд"-ыг 1983 оноос хойш хайгуул хийж, нөөцийг нь тодорхойлсон. Ойролцоогоор 3.1 тэрбум тонн нөөц байна гэсэн судалгаа гарсан байдаг. Үүн дээр олон компани хайгуул хийж, нөөцийг нь тодорхойлсоор ирсэн.
Миний УИХ-ын чуулган дээр яриад байгаа зүйл үнэн. Үүн дээр "Төгрөг Энержи" компани дөрвөн лиценз эзэмшдэг. Хүмүүс янз бүрийн мэдээлэл дээр буруу ташаа ойлголт өгч байх шиг байна. Би УИХ-ын гишүүн, Монгол Улсын Ерөнхийлөгчөөр ажиллаж байсан Х.Баттулга гуайд хандаж хэлье. Та 39 стратегийн ордод хамаардаг Төгрөг нуурын ордыг үндэстэн дамнасан санхүүгийн схем хийж 250 сая ам.доллароор зарсан нь үнэн. Нотлогдсон асуудал. Иймд Х.Баттулга танд өөрийн хутгасан асуудлаа өөрөө шийдэх долоо хоногийн хугацаа өгч байна. Энэ хугацаанд шийдэж чадахгүй бол ЗГ хуулийн хүрээнд дараагийн арга хэмжээг авна.
ЭНЭ МЭДЭЭНД ӨГӨХ ТАНЫ ҮНЭЛГЭЭ?
Like
0
Хаха
0
0
Буруу
0
Гайхмаар
0
Харамсалтай
0
Хөөрхөн
