УТААНЫ СОНСГОЛЫГ УРАГШЛУУЛЪЯ
157 
Утааны сонсголыг хоёрдугаар сарын эхээр хийхээр болсон. Угтаа утааны оргил үед бус нэлээн хожуу гэсэн үг. Цагаан сарын баяр ч дөхчихсөн байх үе. Иргэд анхаарал хандуулах нь хэр л байх бол...
Улаанбаатар өнөөдөр гамшгийн түвшинд байна. Улс нийтээрээ л харж, мэдэрч, шогширч байна. Гагц улс төрчид л бодит байдлаас ангид байх шиг.
Эмнэлгүүд ачааллаа дийлэхгүй байна. Ялангуяа хүүхдийн эмнэлгүүд. Утаанаас болж иргэдийн дархлаа унаж, ханиад томуунд дарлуулсаар. Дан ганц ханиад томуугаар ч тогтохгүй өөр ямар хор хөнөөл бидний биед учирч байгааг ч урьдчилан мэдэшгүй.
Саарал хот. Сааралдаа дасаж, дарлуулсан иргэд...
Сая 31-ний үдэш Төрийн өндөрлөгүүд баярын мэндчилгээ дэвшүүллээ. Утааны талаар огт дурдсангүй, шийдэл цухуйлгасангүй, ойшоосонгүй. Улс оронд, нийслэлд асуудал үгүй мэт л аашлав. Ард түмэн үүнд эгдүүцэж байна. Асуудлаа мэдмээр, мэдэрмээр гээд халаглаж байна.
Утааны сонсголоо урагшлуулъя ч гэж дийлэнх нь давалгаалж байна. Энэ санаачилга зөв. Асуудлыг ард түмний нүднээ ил нэн даруй хөндөж, ард нь ямар тушаа буйг илрүүлэх, хэлэлцэх, цаашлаад зохих хүмүүст нь хариуцлага хүлээлгэх л хэрэгтэй.
Дайны талбар шиг энэ хотыг даруй цэгцлэх, даруй цэгцлэх шийдлийг яаравчлан мэтгэх л хэрэгтэй байна. Иргэд хохирсоор, амиа алдсаар. Утаанд хордсоор. Улс төрчид харин ам, гараа хамхисаар л...
ЭНЭ МЭДЭЭНД ӨГӨХ ТАНЫ ҮНЭЛГЭЭ?
Like
0
Хаха
0
0
Буруу
0
Гайхмаар
0
Харамсалтай
0
Хөөрхөн
