Sanuulga.mn

Шинэ сэргэлтийн бодлогыг зөв "залж яваа" залуу сайдууд

1970-01-01

Админ - Сэтгүүлч

619

10м унших

Шинэ сэргэлтийн бодлогыг зөв "залж яваа" залуу сайдууд

-Бид Солонгос руу ажиллахаар очдог бол тэд манай улсад аялахаар ирдэг боллоо-

Юмыг дандаа хараар харна гэж юу байх вэ дээ. Заримдаа бас гэрэл гэгээг нь олоод үзчих хэрэгтэй юм шиг байгаа. Сая жуулчин авна гэж олон жил ярьсан. Манай улсын тэргүүлэх салбар бол уул уурхай биш, аялал жуулчлал гэж ярьж ч үзсэн. Одоо л тэр “мөрөөдөл” биелэх байдал цухалзаж байна. Ер нь салбар болгон л тэргүүлэх байж гэмээ нь улс орон хөгжиж дэвшинэ. Боловсролын салбарыг ч гэсэн тэргүүлэх биш тэгсхийсэн салбар байхыг хэн хүсэх юм бэ. Эрүүл мэндийг, Хөдөө аж ахуйг гээд бүгд ...

Өнгөрсөн жилийг Засгийн газраас “Монголд зочлох жил” болгон зарласан. Энэ хүрээнд аялал жуулчлал, соёл урлагийн хосолмол арга хэмжээнүүд зохиогдож, жуулчдад “Монгол бол заавал очих ёстой улсын нэг” гэсэн ойлголтыг чамгүй өгч чаджээ. Өнгөрсөн зун Солонгосоос “хагас нүцгэн охид хүүхэн” авчирч ёс заншлыг маань доромжлууллаа гэж хэл амны бай болсон БОАЖ-ын сайд Б.Бат-Эрдэнийн “асуудал” шуугиан хийрхэл намжсаны дараа тогтож харахад зөв зүйтэй ажил байсан нь харагдана. БНСУ-ын модель, загвар өмсөгч дөрвөн эмэгтэйн аялал монголчуудын нүдийг хужирласан.

Заавал мушгидаг зантай нэгний мушгианд ч орсон. Тэд Монголын говийг өөрсдийнхөө өнцгөөс нээж, монгол хүний сайхан сэтгэл, хөгжилтэй зан, эелдэг тусархууг Солонгосчуудад, дэлхийд хэлж өгсөн.

Ямар улсад аялах тухай асуувал Монголд заавал очоорой гэж хэлнэ хэмээн ярилцлага өгсөн. Өвлөөр ирж Хөвсгөлийг үзнэ гэж сэтгэл хоргодож байсан. Эндээс харвал мөнөөх “хагас нүцгэн гэх хүүхнүүд” монголыг дажгүй сурталчилсан юм биш үү.

Манайхан л болсон хойно залуусаа дэмжихдээ хойргоороо алдартай. “Одооны залуус” гэдэг үг бол залуусаа доош хийгээд сурчихсан манай нийгмийн сэтгэлзүйн дэвсгэр нь юм. Зөвхөн өнөөдөр ч бий болчихсон юм биш. Залуу яваагүй юм шиг загнах нь за даа, тийм ч сайн юм биш. Засгийн газрын бүрэлдэхүүнд гуравхан дан дээлтэй сайд байна. Тэдний хоёр нь Б.Бат-Эрдэнэ, Ч.Номин нар.

Энэ хоёр хоёулаа нас залуу. Бас хооронд нь холбох холбоос ихтэй яамдыг толгойлж байгаа. Ямартаа л байгаль орчин, аялал жуулчлал, соёлын асуудал ихэнх Засгийн газрын үед нэгэнтэйгээ уяатай явж ирсэн байх билээ. Залуу сайд нар шинэчлэл өөрчлөлт хийх гэсэн оргилуун хүсэлтэй, омголон сэтгэлтэй, том мөрөөдөлтэй байгаа.

Өнгөрсөн жил Монгол Улс "Welcome to Mongolia" хөтөлбөр хэрэгжүүлж, өнгөрсөн онд нэг сая жуулчин эх орондоо хүлээж авахаар төлөвлөсөн. Арай нэг сая хүрээгүй ч 700 мянга дөхсөн. Үүнийг жилийн 365 хоногт хуваан үзвэл өдөрт дунждаар 2000 орчим жуулчин Монголд ирсэн гэсэн үг.

Өмнөд Солонгосын "JTBC" суваг "Couriers in Mongolia" буюу "Хүргэлт ирлээ..." нэртэй сонирхолтой шоу нэвтрүүлэг хийсэн. Соёлын яам, Байгаль орчин, Аялал жуулчлалын яамны дэмжлэг орсон байх.

Өмнөд Солонгосын А зэрэглэлийн жүжигчин Жан Хёг, шилдэг жүжигчдийн нэг Хун Кён Ин нарын оролцсон шоу амжилттай болж манайхан солонгосчуудын нүдээр өөрсдийгөө хараад авсан. Ингэж харахад өөрсдөд маань сонирхолтой байгаа юм чинь бусад орны үзэгчдэд “гоё” байсан биз. Морь унах дуртай Жан Хёг жүжигчин бусаддаа морь унах зөвлөгөө өгч, хонь адуу туугаад давхиж яваа нь хэн хүнд Монголын хээр талд очоод ингэж үзэх сэн гэх сэтгэгдлийг төрүүлэхгүй гэж үү.

Ерөнхий сайд өөрөө залуу хүн учраас танхимынхаа залуу сайдуудыг дэмжиж ажилладаг нь мэдрэгддэг. Цаашдаа жилээс жилд аялал жуулчлал, соёл урлаг, байгаль орчны асуудал та бидний анхаарлын төвд хүчтэй орж ирэх зам нээгдлээ.

Т.Санаа

Sanuulga.mn