Хотын дарга метроны тухай урт яриандаа юуг өгүүлэв?
616 
Хотын дарга маань цасаа хусчихаад араас нь давсаа цацах технологийн лекцээ огцом өөрчлөв. Давс цасны дараах лекц нь ёстой тэнгэр газар шиг ялгаатай юм. Метроны зовлон ингэж ил болов. Метрог Э.Бат-Үүл ч санаачлаад л санаа алдаад барьчих шахаад байсан юм биш байна. Аль 1983 онд Улаанбаатарын 4 газарт зөвлөлтүүд өрөмдөж, хөрсний дээж авч байсан аж. Мэдээж 500 мянган хүнтэй хот байхаар төлөвлөсөн хотыг 3 дахин олон хүнээр цутгаад үер буулгачихсанаас бүхий л дэд бүтцийн ачаалал нь тэсч гарахааргүй болж хүндэрсэн. Эрчим хүч, дулаан, цэвэр усны хангамж, тээврийн хэрэгсэл, цэвэрлэх байгууламж нутаг дэвсгэрийн хэмжээ гээд л олон асуудал гарч ирдэг.
Хотын дарга Х.Нямбаатар түгжрэлийг шийдэх асуудал буюу метроны талаар эдийн засгийн сэтгүүлчдийн клубын сэтгүүлчидтэй уулзаж метро болон бусад томоохон төслүүдийн талаар мэдээлэл өгөв. Эдийн засаг бичдэг сэтгүүлчид асуудалд арай бодитой, тооцоололтой хандана гэж үзсэн бололтой. Нэг ширхэг талх худалдаж авсан ч сонголт чухал болохоор олон хувилбар байгаа аж. Метроны маршрут нь Амгалан өртөөнөөс Толгойт өртөө хүртэл ойролцоогоор 17,6 км, депо дотор зай талбайтайгаа нийлээд 18,3 км орчим нэгдүгээр шугамтай төлөвлөсөн байна.
Үүнээс гадна Б хувилбар ч хотын даргын халаасанд байгаа юм. Тэр нь Улаанбаатар хотын түгжрэлд нөлөөлж буй Яармагийн замын ачааллыг давхар шийдчих сайн талтай. Энэ маршрутаар зүүн талаас Амгалангаас явуулж Таваншар өнгөрөн төмөр замаар давуулаад “Степпа Арена” хүргэнэ. Түүнээс цааш газраар LRT нөхцөлөөр Хөшигийн хөндий хүргэх 60 км урт EPC нөхцөлөөр тендер зарлах хувилбар яригдаж байгаа аж. Үүнийг урьдчилсан ТЭЗҮ-тэй харьцуулан, гадны зөвлөхүүдтэй ярилцаж шийдлийг олох юм байна.
Х.Нямбаатар: Метроны төсөл нь урьдчилсан ТЭЗҮ-ээр 1.3 тэрбум гаруй ам.долларын төсөвт өртөгтэй гэж нэгэнтээ хэлж байсан. Метроны аль ч хувилбараар явсан бай 6,6 км нь далд явна. Мэдээж газрын гүнээр явуулах нь өртөг өндөр тусна. Зах хэсэг дээрээОфицеруудын ордны орчмоос газар доогуур орно. Аравдугаар хорооллын ногоон байгууламж хавиас газар доороос гарч ирнэ гэнэ.
Сонирхуулахад Засгийн газрын түвшинд метрогоор мэргэшсэн дөрвөн хүн л байдаг аж. Харин гадаадад метрогоор мэргэжээд ажиллаж байгаа залуус бий гэнэ. Хотын дарга тэднээс туслалцаа хүсч, эх орондоо ирж ажиллахыг урьжээ. Улаанбаатар хот метроны санхүүжилтээ өөрөө хариуцах юм. Тийм учраас хотын татварыг хоёр дахин нэмэгдүүлж 32 тэрбум төгрөгт хүргэсэн бололтой. Далайд дусал нэмэр. 1,3 тэрбум гаруй долларын ТЭЗҮ-тэй метро шүү дээ. Хотын одоогийн дарга маань Э.Бат-Үүл дарга шигээ бас метроны яриа нь маш их урт аж. Хотын дарга маань ярианаас урт метро байгуулах биз ээ.
Т.Санаа
Sanuulga.mn
ЭНЭ МЭДЭЭНД ӨГӨХ ТАНЫ ҮНЭЛГЭЭ?
Like
0
Хаха
0
0
Буруу
0
Гайхмаар
0
Харамсалтай
0
Хөөрхөн
